దేశవ్యాప్తంగా ఉన్న రాజకీయ నేతల్లో 4,442మంది క్రిమినల్ కేసుల్లో విచారణ ఎదుర్కొంటున్నారు. వీరిలో 50శాతానికిపైగా( 2,556)మంది ప్రస్తుతం.. ఎంపీలు, ఎమ్మెల్యేలుగా సేవలందిస్తుండటం గమనార్హం. దేశంలోని వివిధ హైకోర్టులు.. సుప్రీంకోర్టుకు సమర్పించిన నివేదికల ద్వారా ఈ విషయం బయటపడింది.
"హైకోర్టులు సమర్పించిన నివేదికల ప్రకారం.. మొత్తం 4,442 కేసులు పెండింగ్లో ఉన్నాయి. వీటిలో 2,556 కేసుల్లో ప్రస్తుత చట్టసభ్యులు నిందితులుగా ఉన్నారు. కేసులకన్నా.. నేర చరిత్ర ఉన్న చట్టసభ్యులే ఎక్కువగా ఉన్నారు. ఒక కేసులో.. ఒకరికన్నా ఎక్కువ మందిపై ఆరోపణలు ఉండటం, ఓ కేసులో నిందితుడిగా ఉన్న చట్టసభ్యుడు మరో కేసులోనూ విచారణ ఎందుర్కొంటుండటం ఇందుకు కారణం."
--- హైకోర్టుల నివేదిక.
చట్టసభ్యులపై ఉన్న క్రిమినల్ కేసుల విచారణను వేగవంతం చేయాలని భాజపా నేత, న్యాయవాది అశ్విని ఉపాధ్యాయ్ గతంలో ప్రజా ప్రయోజన వ్యాజ్యం దాఖలు చేశారు. ఈ పిటిషన్ను పరిశీలించిన సర్వోన్నత న్యాయస్థానం.. పెండింగ్లో ఉన్న కేసుల వివరాలు సమర్పించాలని హైకోర్టులను ఆదేశించింది. ఈ నేపథ్యంలోనే హైకోర్టులు నివేదికలను సుప్రీంకు పంపించాయి.
ఆ నివేదికల ప్రకారం... 352 కేసులపై సుప్రీంకోర్టు, హైకోర్టులు స్టే విధించాయి. నేరం రుజువు అయితే.. జీవిత ఖైదు శిక్ష పడే కేసులు 413. వీటిలో 174 మంది ప్రస్తుత చట్టసభ్యులు నిందితులుగా ఉన్నారు.
ఉత్తర్ప్రదేశ్ టాప్...
1,217 పెండింగ్ కేసులతో ఉత్తర్ప్రదేశ్ ఈ జాబితాలో తొలిస్థానంలో ఉంది. ఇందులోని 446 కేసుల్లో ప్రస్తుత చట్టసభ్యులు ఆరోపణలు ఎదుర్కొంటున్నారు. బిహార్లో 531కేసులు విచారణ దశలో ఉండగా.. అందులోని 256కేసుల్లో ప్రస్తుత ఎంపీలు, ఎమ్మెల్యేలు నిందితులగా ఉన్నారు.
ఇదీ చూడండి:- చట్టసభల్లో నేర చరితుల ఉరవడి
